neend to dard ke bistar pe bhi aa sakati hai

[captain]

umr jalvon main basar ho ye zaruuri to nahin
har shab-e-Gam ki sahar ho ye zaruuri to nahin

chashm-e-saaqi se piyo yaa lab-e-saagar se piyo
beKhudi aathon pahar ho ye zaruuri to nahin

neend to dard ke bistar pe bhi aa sakati hai
unakii aagosh me.n sar ho ye zaruuri to nahin

sheKh karataa to hai masjid main Khudaa ko sajade
usake sajadon main asar ho ye zaruuri to nahin

sab ki nazaron main ho saaqi ye zaruuri hai magar
sab pe saaki ki nazar ho ye zaruuri to nahin